-->

أسئلة و أجوبة عن كيفية الشراء عبر الأنترنيت | للمغاربة فقط

أسئلة و أجوبة عن كيفية الشراء عبر الأنترنيت | للمغاربة فقط
    الشراء عبر الأنترنيت موضوعنا اليوم. الشرح غايكون بالدارجة المغربية، حيث موجه بشكل كبير للمغاربة و المعلومات لي فيه و الدوانة ايلا ما ذلك متعلقة بالمغرب. أسئلة و أجوبة عن الشراء عبر الأنترنيت غانجاوبو على أغلب الأسئلة المتعلقة بكيفية الشراء من الأنترنيت | المواقع الصينية. بما فيها المواقع و الدوانة و المنتجات......

     كيفاش نفتح حساب بنكي من أجل الشراء؟ أحسن بنك مغربي بالنسبة للشراء عبر الأنترنيت؟ طريقة التوصل بالمنتجات لي شريتها من الأنترنيت؟ شنا هنا المواقع الصادقة الموثوقة و النصابة ؟ اسئلة متعلقة بالدوانة ؟ و أنواع المنتوجات لي كايتشدو فالدوانة ؟ و كيفاش نتبع الطلب ديالي بعد الشراء ديالو ؟
    كيفية الشراء من الانترنيت المغرب

    كيفاش نقدر نشري من المواقع الأجنبية؟

    خصك تكون كاتمتلك بطاقة بنكية دولية كاتطلبها من البنك، وكاتختلف القيمة اللي كاتخلص مقابل هاد الخدمة من بنك لآخر، وتقدر كذلك تشري بواسطة حساب بايبال.

    شناهما المواقع الأجنبية الموثوقة؟

    كاينين بزاف د المواقع ومن أشهرهم AliExpress.com و Banggood.com و GearBest.com و JoyBuy.com و باقي الخير...

    كيفاش ندير نفتح حساب بنكي مرفوق ببطاقة مصرفية دولية؟

    خاص يكون فعمرك اكثر من 18 سنة، كاتدي معك البطاقة الوطنية للبنك اللي اختاريتي، وكاتطلب منهم يفحتو ليك الحساب لي بغيتي.

    شنو هي أحسن بطاقة بنكية فالمغرب من ناحية الشراء من المواقع الالكترونية الأجنبية؟

    كرأي شخصي مالقيتش أفضل من بطاقة كود 30 ديال Cih والخاصة بالشباب لي عندهم أقل من 30 سنة، وبالنسبة للنساء، Cih دارت ليهم حساب سميتو سيدتي مجاني مدى الحياة، وعندو نفس مميزات كود 30 من ناحية الشراء من الأنترنت.

    واش بمجرد ما نفتح الحساب غانقدر نبدا عملية الشراء فنفس النهار؟

    لا خصك تسنا حتى تخرج ليك البطاقة المصرفية ديالك، وكيستغرق الأمر من أسبوع إلى أسبوعين، أما إلا داز اكثر من هاد الوقت وماوصلاتكش، غايخصك تستفسر البنك ديالك حول الأمر.

    كيفاش نقدر نشري من الموقع الفلاني؟

    طرق الشراء من جميع المواقع العالمية سهلة وبسيطة جدا، لكن مع ذلك إلى ماعرفتيش، يكفي تمشي لموقع اليوتيوب وتكتب طريقة الشراء من موقع X ولا Y ولا أي موقع بغيتي، وكاتبع الشرح اللي فالفيديو.

    واش ممكن المشتريات ديالي توصلني حتال باب الدار؟

    نعم يكفي فالمعلومات ديال الشحن تدير العنوان الكامل ديال الدار.

    بغيت نشري ولكن الدار لي ساكن فيها مافيهاش عنوان وماكيوصلهاش الفاكتور، كيفاش يقدر يوصلني داكشي لي شريت؟

    لنفترض كاتسكن فالمدينة A وبالضبط فالحي X . فالخانة الخاصة بالعنوان ديالك فالموقع لي غاتشري منو، كتب La poste X وموراها اسم المدينة. باش توصلك فوكالة البريد لي كاينة فالحي لي كاتسكن فيه، وفهاد الحالة ملي توصلك غاتمشي تاخدها من تما بكل بساطة، وماشي ضروري يكون عندك صندوق البريد فالبوسطة.

    كيفاش نقدر نعرف الموقع لي بغيت نشري منو واش صادق ولا نصاب؟

    المواقع الصادقة راها معروفة وفيها كاع المنتوجات لي ممكن يطيحو فبالك، لكن مع ذلك لنفترض شي موقع عمرك سمعتي عليه وعجبك، يكفي تكتب سميتو فمحركات البحث بحال Google و Youtube وغادي تاخد عليه فكرة، وإلا ماخرج ليك عليه والو، راه يعني ماكيعرفو حتى واحد، وبالتالي يقدر يكون وهمي ونصاب.

    واش أي حاجة شريتها غاتوصلني؟

    كاينة قائمة الممنوعات فالمغرب اللي الا شريتيها غاتحبس فالديوانة وغاتقدر تجرك للمساءلة القانونية، بحال الأسلحة بجميع أنواعها، والأشياء لي ممكن تلحق الضرر الجسدي بالآخر، كما أنه من بين الممنوعات كانلقاو طائرة درون، والطابعة ثلاثية الأبعاد.

    شنو هي الأشياء اللي الا شريتها غادي يخصني نخلص عليها فالديوانة؟

    الهواتف الذكية والأجهزة الالكترونية اللوحية، والحواسيب.. وأي حاجة شريتي منها عدد كبير غادي يحبسوها فالديوانة حيت غايبان ليهم بأن الغرض ديالك تجاري، وبالتالي غايخصك تخلص عليهم الجمارك.. لكن وجب الأخذ بعين الاعتبار أنه كاتكون استثناءات، وتقدر تشري شيحاجة من هادشي لي كيخلص عليها الغير الجمارك، لكن نتا توصلك بلا ماتخلص والو، هادشي كيوقع على حسب كل واحد والحظ ديالو، لكن على العموم المشتريات العادية ماغاتلقاوش فيها مشكل مع الديوانة.

    الا شدو ليا شي حاجة فالديوانة فين غادي نقدر نخلص عليها؟

    الا كنتي اختاريتي فالموقع توصلك فالبريد العادي المسجل راك غاتخلص عليها فوكالة البريد ديال مدينتك، لكن إلا اختاريتي توصلك فإحدى شركات الشحن السريع وشدوها الجمارك، غايخصك تمشي ليها للمطار ديال الدار البيضاء.

    شنو الفرق بين البريد العادي المسجل، والشحن السريع؟

    البريد العادي بحال مثلا البريد الصيني، البريد الهولندي، البريد السنغافوري، البريد البلجيكي.. الخ. هادو غالبا كاتستغرق مدة التوصيل ديالهم بين 20 و 30 يوم باستثناء البريد الصيني اللي كيتعطل اكثر، أما شركات الشحن السريع كاينة DHL وأرامكس وفيديكس وغيرهم من شركات الشحن السريع الاخرى لي مدة التوصيل ديالهم كاتستغرق أسبوع تقريبا أو أقل، لكن كاتكون تكلفة الشحن مرتفعة.. ولا أنصح بها بخصوص المشتريات لي فيها شك بخصوص الديوانة، بل لا أنصح بها بشكل مطلق الا في الحالات المستعجلة.

    كيفاش نعرف الطلبية ديالي فين وصلات؟

    ملي كاتشري من أي موقع معين، كيعطيوك واحد الكود كيتسما Tracking Number كاتيليشارجي تطبيق سميتو 17Track وكاتدخل فيه داك الطراك وكل مرة كاتعرف فين وصلات الطلبية ديالك. حاول دائما فوسيلة الشحن تختار البريد المسجل.

    شنو المبلغ لي ماعنديش الحق نفوتو فالعام ؟

     فالمغرب بخصوص الشراء من المواقع العالمية المبلغ المحدد هو مليون سنتيم - 10.000 درهم.

    واش كاينة شي حلول باش نقدر نشري الا وصلت للحد المسموح به؟

    نعم موجودة الحلول، تقدر تفتح حسابات بنكية لخوتك ولا والديك فسمياتهم على أساس باش تستغلها نتا، وتقدر كذلك تتسجل فالبايبال وبقا تشري الصولد لي غاتشري بيه.

    منين نقدر نشري الصولد ديال بايبال؟

    موجودين الناس لي كيبيعوه، لكن ماعمرك تتعامل مع شيحد فهاد الجانب عن طريق الانترنت الا ماكنتيش كاتعرفو، ولا إلا ماكانش معروف فالأنترنت، بل خصك تلاقا معه مباشرة فشي مقهى وقضيو الغرض.

    اقرأ أيضا :  كيفاش وعلاش الدرون Drone ممنوع في المغرب؟
    اقرأ أيضا :  تسجل الأن في موقع AliExpress و أحصل على كوبونات بقيمة 19 دولار

    أي سؤال نسيت ماجاوبتش عليه، كتبوه فالتعليقات لتحت و غانضيفوه للقائمة.
    ---
    شارك الموضوع عبر:

    إرسال تعليق