الدرون Drone أو طائرة بدون طيار كايتم التحكم بها عن بعد بواسطة جهاز تحكم وللإشارة الدرون ماشي ممنوع في المغرب: الاستعمال ديالو مؤطر بقوانين ضروري يحترمها المستعمل.
خواتاتي و خوتي… موضوع اليوم هام جدا… فكرنا نقادوه ونشاركوه معاكوم لتعم الفائدة، وأيضا باش نوضعو حد لواحد العدد كبير ديال التساؤلات اللي كايطرحوها بزاف ديال الأعضاء في العديد من المجموعات الفيسبوكية. و غانحاولو نجاوبو على هاد الأسئلة :
- كيفاش وعلاش الدرون Drone ممنوع في المغرب؟
- واش كاين شي قانون كايحدد وكاينظم استعمال الدرون؟
- شكون يقدر يحصل على رخصة ديال درون ؟
- واش نقدر نشري درون Civil ؟
- يلا لقاو عندي درون ؟
- منين ناخد الرخصة باش نشريه ؟
كيفاش وعلاش الدرون Drone ممنوع في المغرب؟
- موقع الجمعية المغربية للدرون Association Drone Maroc . العنوان ديالها www.marocannuaire.org
- بعض المواقع الصحفية الموثوقة المغربية منها والفرنسية أيضا
ملحوظة 2: بالنسبة للقانون الفرنسي، الدرون إيلا فات 800 غرام، كايخص مولاه يدوز واحد امتحان QCM en ligne وخاص يكون فيه ضواو كايسنيو باش يتشاف. ويلا فات الوزن ديالو 25 كيلو ، كايخصو يتسجل ب immatriculation بحال شي موطور ولا طوموبيل، ويكون مصادق عليه homologué ، ومولاه يكون عندو brevet. فيلم باكستاني هذا!!!
واش كاين شي قانون كايحدد وكاينظم استعمال الدرون ؟
فالخارج : موجودة ترسانة مظبوطة ديال استعمال الدرون، كاتحدد شروط حيازة هاد اللعيبات، وكاتنظم الاستعمال ديالها، خاصة وأنها كاتولي تبرزط ناس أخرين… نقدرو نرجعو نكتبو عليها من بعد.
فالمغرب: عنداك تقول مع راسك راها سايبة ههه… لا آخالي، كاين قانون وتعلن عليه فالجريدة الرسمية Bulletin Officiel بتاريخ 23 فبراير 2015… باقي أخضر، عرفت ههه!
هاد القانون آسيادنا يقول باختصار أن "الحيازة ديال الدرون خاضها ترخيص Autorisation من عند السلطات المختصة، واللي كاتجي على راسها الداخلية" . معلوم، بما أن الاستعمال ديال هاد الطائرات يقدر يتضمن أخطار من قبيل تهديد الأمن العام والترابي. هذا من جهة. ومن جهة أخرى، كايهدد الحرية الشخصية ديال بنادم.
شكون يقدر يحصل على رخصة ديال درون ؟
- العاملين في مجال الإعلام : الصحافة، صناعة الأفلام، وكالات التواصل Agences De Communication، وما شابه ؛
- بعض الإدارات اللي كاتحتاج الاستعمال ديال هاد الماتريال…بحال الفلاحة، الصيد البحري، الوقاية المدنية، … هاد الناس يقدرو ايستعملو الدرون فالمراقبة ، في الوقاية، فالتدخل السريع،… موجود مايتدار…
للإشارة، الرخصة كايخصها تتجدد سنويا، ومع ذلك، فوسط العام فوقت ما تبغي تخدم بالدرون المرخص كاتطلب رخصة عاودتاني من عند السلطة المحلية (القيادة).
* الموضوع منقول من هاد المجموعة : GearBest & AliExpress Pour Marocains
ياك أنا سيڤيل، وداك الدرون سميتو "Civil" … إذن نقدر نشريه ؟
ههه، جرب و شوف !!! راه ماشي غير بغاو يمنعوك وصافي، رأه غير كاين قانون توضع باش يخدم المصلحة العامة بالدرجة الأولي. إيلا كنتي فيك واحد من هاد الشروط اللي ذكرنا ، مرحبا…
واخا… ويلا لقاو عندي درون؟
إيلا وصلك شي درون من برا، وشداتو الديوانة غادي يعيطو ليك ويسولوك : كاين شي طوريزاسيو؟ إيلا لقاوها هز طيارتك وخرج (ولكن بلاتي، ماتخدمهاش حتى نقوليك فوقاش…صبر هانا راجع!). إيلا مالقاوهاش : السيزي، ويقدرو يضربوك بشي غرامة محترمة (سمعت شي “بركة” أي عشرالاف درهم)، ولا قدر الله، اعتقال ومحكمة…يا لطيف!!!
إيلا كان عندك درون قبل مايخرج داك القانون اللي هدرنا عليه الفوق، ضروري من السلطات المحلية حداك تعرفو، ويا تخرج ليك رخصة، يا تحيدو ليك!
إيلا شي توريست جاي داخل وجايب معاه درون، مايخليوهش يدخل بيه. يقدرو يجرجروه، ويلا عندو شي زهر وديكلاراه قبل ما يدخل للتراب الوطني، يخليوه عندهوم معزز مكرم ويعطيوه Reçu حتى يكون راجع وياخدو في أمان الله.
ولكن علاش بنادم شرا درونات صغيورين ودخلهوم…؟
آه، كاتهدر على دوك قشاوش ديال عيشورة ؟؟؟ الدرون باش يولي كايشكل خطر كايكون عندو مواصفات معينة، ويقدر يهز كاميرا، وبالخصوص، يكون كايوزن فوق من واحد القدر معين ديال الغرامات… راه هدرنا الفوق على كيلو قل ميتين.
وزيدك، والله و فكرتي تغير المعالم ديال داك اللعبة، وتردها كاتصور وكاتتيري القنبول و و و… والله و حصلتي راك عارف…
منين ناخد الرخصة باش نشريه؟
راه قلنا ليك خاصك تكون مهني، عاقل؟ ماعليناش… كاتمشي لعند الوزارة المنتدبة المكلفة بالتجارة الخارجية، واللي كاتنسق مع الداخلية، وتقدر تدخل فيها حتى الوكالة الوطنية لتقنين المواصلات ANRT …
(هادي تابعانا فالتيليفونات، فالويفي، وحتى فالدرونات…؟؟؟)
لا آمولاي، دايرة خدمتها، من حيث الدرون فيه موجات ديال الإرسال…
إيوا دابا أنا ماغاديش نحقق الحلم ديالي نولي طيار بلا ما نطير؟؟؟
هههه، إيلا بقيتي كاتطير غادي تجيبها فعظيماتك !!!
ولكن عقلتي منين قلت ليك جبت هاد المعلومات كاملة؟
كاينة جمعية ديال الدرونات… والجمعية قانونيا كاتدخل في خانة المؤسسات الرسمية اللي معترفة بها الدولة…يعني تقدر تخرج رخص للأعضاء ديالها باش يستعملو الدرون فشي حاجة ماكاتعارضش القانون !!!
مثلا: مسابقات فقيادة الطائرات من نوع الدرون في إطار تعليمي محض، بتنسيق مع السلطات المحلية، بحال الجوندارم ؛
تصوير تظاهرات فنية، ثقافية، … بالدرون، في إطار أشغال الجمعية، ماشي لأغراض شخصية…(نسا العرس ديال خوك الكبير ولا بنت خالتك ههه) وقس على ذلك…
يعني تقدر تقرر تنخرط فهاد الجمعية اللي كاينة، ولا تجمع الخواتات والخوت اللي هنا، باغيين يطيرو، وتديرو جمعية ديالكوم، سميوها “جمعية قدماء أصدقاء السي علي الراپيد” لي باغيين يطيرو.