وقايتنا Wiqaytna هو واحد التطبيق تم إطلاق ديالو من قبل وزارة الصحة بداية شهر يونيو 2020 .. و الهدف ديالو هو العمل على الحد من انتشار الجائحة [ Covid-19 ] من خلال متابعة الأشخاص وتنبيههم بعد مخالطة مصاب بوباء كورونا أي وقايتنا كما جاء في اسمه. باقي التفاصيل أكثر في باقي المقال، وللإشارة فالمغرب يعد من بين الدول القليلة في العالم التي تبعت هاد التجربة، لهذا فهاد الشرح غانهضرو باللهجة والدارجة المغربية باش كولشي يفهم.
1. شكون لي طور التطبيق ؟
تطبيق وقايتنا | Wiqaytna تمت البرمجة ديالو على يد فريق مطورين مغاربة بتعاون و تواصل مع كل من وزارتي الصحة و الداخلية و كذا الوكالة الوطنية لتقنين الإتصالات [ ANRT ] بالإضافة إلى وكالة التنمية الرقمية [ ADD ] و تم المساهمة في هاد العمل تطوعيا من قبل مقاولات و شركات مغربية في مجال التقنية ..
التطبيق مصادق عليه من قبل اللجنة الوطنية لمراقبة حماية المعطيات ذات الطابع الشخصي [ CNDP ].
2. ضروري نأنسطالي التطبيق!
لا ماشي ضروري، كتبقى مبادرة منك خصوصا إلى كنتي كتخرج بزاف بسباب العمل أو ظروفك الصحية لي كتخليك تخرج على قبل المتابعة الطبية .. أو أي ظرف آخر فحبذا لو يكون التطبيق في الهاتف ديالك باش تساهم في دراسة هاد الجائحة و الحد من الوباء و ترجع الأمور إلى سابق عهدها. لأنه بالإضافة إلى باقي الأحتياطات لي تاخدتها الدولة، التطبيق جا باش يدعم دآكشي و غادي يكون الدور ديالو في :
- تسهيل تحديد مخالطي الحالات المؤكدة إيجابيا إصابتها ب"Covid-19".
- تعزيز قدرة تدخل فرق تتبع المخالطين.
- تحقيق استعمال أمثل لتحاليل الكشف عن الفيروس.
3. طريقة تثبيت التطبيق!
عادي بحال أي تطبيق، دخل لـ [Play Store] أو [AppStore] حسب نوع هاتف و بحث على التطبيق [Wiqaytna]. أو من الروابط لي لتحت:- فاش تآنسطاليه، دخل رقم الهاتف ديالك.
- غادي توصلك رسالة تأكيد، هنا رد البال لقائمة الإشعارات حيث ما غاديش توصلك في رسالة نصية.
- صلاحية وحدة لي غادي يطلب منك هي [Bluetooth] لأنه هي باش يخدم التطبيق في آلية العمل ديالو.
- من إعدادات التطبيق يمكن ليك تملئ البيانات المتعلقة بيك [ الفئة العمرية | الجنس | الجهة | العمالة أو الإقليم ].
4. كيفاش كيخدم تطبيق وقايتنا ؟!
التطبيق كيعتمد على تبادل الإشارات ديال البلوتوث بين تلفونك و باقي التلفونات لي فيهم التطبيق لي قراب ليك ضمن نطاق 10 متر ( لي هو نطاق تغطية البلوتوث ) ..
فينما تلفونك كآن حداه تلفون آخر فيه التطبيق كيسلم عليه بالبلوتوث كيقوليه هاك كرت فيزيت ديالي و ارا الكرت فيزيت ديالك ..
وهادشي ماشي بالضرورة حداك شخص واحد و إنما يقدرو يكونوا بزااف.
على حسب تواجدك أنت فين ! ( طوبيس، ترام، طاكسي، سوق، مكان العمل، و انت غادي في الشارع ... ).
هاد الكرت فيزيت تعبير مجازي و لي هي في الحقيقة كودات عشوائية كيبقاو في التلفونات لي سلمو على بعضياتهم.
و على فرض واحد من هاد التلفونات ماليهم اكتشف أنه مصاب لا قدر الله بفايروس كورونا كوفيد-19، السيد لاخر غادي يتوصل بإشعار أنه كآن مخالط لواحد تصاب بكورونا و غادي يطالبوه بأنه يلتزم بالحجر الصحي ..
5. خاص البلوتوث يبقى خدآم؟
تماما .. حيث التطبيق كيستعمل مؤشرات RSSI (Received Signal Strength Indication) باش يحدد مدى قرب الأشخاص من بعضهم حسب المسافة و كذلك المدة شحال بقاو مع بعضهم ( كيف سبق و قلت قبل، أنت و فين كنتي و معامن تخالطتي سوا في مواصلات أو سوق أو ...) .. و هكذا التطبيق كيف قلنا كيسجل كودات ديال باقي الهواتف و لي من بيناتها الرقم ديال التلفون ..
هاد البيانات كتبقى مشفرة في تلفونك و كتمحى تلقائيا بعد 21 يوم لي فيها فترة حضانة الفيروس و كذلك الفترة لي يمكن تكون كذلك خالطتي فيها أشخاص محتمل أنهم مصابين ..
دابا في حال تم الكشف على أنك مريض بعد نتيجة تحليل إيجابية أو كنتي من المخالطين ديال أحد المصابين .. كيتم تحويل هدوك البيانات للفريق المختص مباشرة باش يعلمو كاع المخالطين بنوتيفيكآسيون أنهم يشدو الدار و غادي يبقاو معاهم على متابعة بالهاتف ..
في حال وقع خلل و ما توصلش الفريق المختص بالبيانات ديال المخالطين ديالك .. غادي يتصلو بيك أو يسفطو ليك رسالة و يعطيوك كود غادي تدخلو في خانة [ رفع المعطيات ] في واجهة التطبيق.
- باش غادي نعرف أنه التطبيق خدآم !
غادي تلقى [ Notification ] ديما كاينة، كتقوليك التطبيق راه خدآم، و إلى ما كآنش خدآم غادي تعلمك.
و باش تجرب ! طفي البلوتوث و غادي تبدل الـ[ Notification ] .. و تعلمك أنه التطبيق ما خدآمش.
- التطبيق كيخدم بالأنترنت ؟
غادي يحتاج الأنترنت فقط باش يقوم بتحديث المعطيات حول الحالة الوبائية المتجددة يوميا ( المتعافون | الوفيات | الحالات المؤكدة ]
و كذلك على قبل رفع البيانات ديال التطبيق للسرفر مرة في اليوم.
- واش هادشي غادي يأثر على تلفوني؟
لا! تطبيق وقايتنا Wiqaytna غادي يخدم عادي و ماا غاديش يستهلك البطارية بشكل كبير .. غادي يخدم بحالو بحال أي تطبيق عادي.
وحتى من البلوتوث ما غاديش يتأثر باستعمالك للسماعات أو أي أجهزة كتكونكطيها مع تلفونك ..
- ما يكونوش زعما كيتجسسو علينا !!
أولا التطبيق ما كيطلبش منك صلاحية [ GPS ]
ثانيا طالما أنك متصل بشبكة الأنترنت فأنت معرض للتجسس من أي طرف كآن
ثالثا و آخيرا و لصحاب نظرية المؤامرة، هذا رابط الشفرة المصدرية [Code Source] ديال التطبيق على منصة [github] و تفحص مع راسك ..
https://github.com/Wiqaytna-app
رابط الموقع الرسمي للتطبيق : Wiqaytna.ma
قبل ماتمشي شوف موضوع: شرح تطبيق ClipClaps لربح المال من هاتفك
أي سؤال أخر خليوه في قسم التعليقات، تبقاو على خير !